ОИВ инфекцияси касаллигининг клиник кечиши

ОИВ инфекцияси касаллигининг клиник кечиши
Касалликнинг клиник кечиши бошка юқумли касалликлардаги сингари бир неча даврларга бўлинади.
Касалликнингяширин даври — бу давр ОИВ инфекциясини юқтириб олгандан кейин хеч қандай клиник белгиларсиз 8-12 ҳафта, хатто 5-10 йилгача давом этиши мумкин. Бу давр эпидемиологик жихатдан энг хавфли давр хисобланади, чунки бу пайтда вирус қонда сезиларли даражада бўлмагани учун, ОИВ билан зарарланган одам муайян вақтгача вируснинг таъсирини сезмайди ва касалликни ўзи ҳам билмаган ҳолда бошқаларга юқтириб юриши мумкин.
Меъёрда ишлаб турган иммунитет тизими (касалликка қарши кураш қобилияти) йиллар давомида вируснинг тажовузини босиб туради, лекин вирус вақт ўтиши билан қонда кўпайиб, аста-секин иммунитет тизимини издан чиқаради, пировардида организм вирусга қарши курашиш хусусиятини йўқотади. Бундай шароитда вирус организмда қаршиликсиз кўпайиб боради. Кўп йиллар давомида сақланган мувозанат бузилиб, маълум даражага етгандан сўнг ОИТС — орттирилган иммунинет танқислиги синдроми бошланади.
ОИВ инфекциясининг дастлабки клиник кўриниши гриппга хос белгилар билан кечади. Бунда кам қувватлиқ иштаханинг пасайиши, кўп терлаш, тана ҳароратининг кўтарилиши, лимфа безлари, жигар, талоқнинг катталашуви кузатилади. Бўғинларда оғриқ бемор терисида ҳар-хил тошмалар пайдо бўлади, йўтал, сабабсиз ич кетиш бошланади ва бу ҳол узоқ муддат давом этиши мумкин. Қон ОИВ инфекциясига текширилганда мусбат натижа кузатилади. Бемор турли касалликларга берилувчан бўлиб қолади ва бу ҳолат тез-тез қайталаниб туради. Бу холат бир-икки хафта ичида ўз-ўзидан ўтиб кетиши ва беморда 8-10 йил давомида хеч қандай аломатлар юзага чиқмаслиги мумкин. Бу юқорида айтилганидек зўриқиб ишлаб турган иммун тизимининг вирус билан курашиши натижасидир. Иммун тизими сусайиб боргани сари, инсон организмида мавжуд бўлган ёки ташқи муҳитдан доимий равишда тушиб турган бошқа микроорганизмлар иммунитет назоратидан холи бўлгани учун кескин кўпая бошлайди ҳамда ҳар бири ўзига хос белгиларни намоён этади. Масалан, нафас йўлларига инфекция тушган бўлса, йўтал, хансираш, хазм йўлига инфекция тушса, қоринда оғриқ ич бузилиши, кўнгил айниши каби белгилар намоён бўлади. Ҳар бир беморда ички ҳолати ёки ташқи муҳит билан бўлган мулоқотига боғлиқ равишда турли белгилар юзага чиқиши мумкин, демак беморларда намоён бўлган белгилар ёки шикоятларига қараб унинг ОИВ инфекцияси билан касаллангани ҳақида хулоса қилиб бўлмайди. Беморнинг ОИВ инфекциясини юқтириб олганини аниқлаш учун албатта унинг қонини лаборатор тахлилдан ўтказиш зарур.

🎗 @xvoits